ପଟ୍ଟାମୁଣ୍ଡାଇ ତା ୨/୪- -କେନ୍ଦ୍ର ସରକାର ନିର୍ବାଚନମଣ୍ଡଳୀ ପୁନଃ ଗଠନ ପାଇଁ ପଦକ୍ଷେପ ନେଇଥିବାରୁ ରାଜ୍ୟ ସରକାର ପ୍ରଶାସନିକ ସୁବିଧା ପାଇଁ ବ୍ଲକ ପୁନଃ ଗଠନ କରିବା ପାଇଁ ଯୋଜନା କରୁଛନ୍ତି । ଏଇ ପରିପ୍ରେକ୍ଷୀରେ ପଟ୍ଟାମୁଣ୍ଡାଇ ଓ ଆଳି ବ୍ଲକର ଉପାନ୍ତ ଧୋୟାଞ୍ଚଳ ବନ୍ୟା ବିପନ୍ନ ପଂଚାୟତକୁ ନେଇ ବ୍ରାହ୍ମଣୀ ବ୍ଲକ ଗଠନ ପାଇଁ ଧୋୟାଞ୍ଚଳବାସୀ ଦୀର୍ଘ ଦିନ ହେବ ଦାବୀ କରିଆସୁଛନ୍ତି । ବ୍ରାହ୍ମଣୀ ନଦୀ ଅବବାହିକାରେ ଥିବା ପଟ୍ଟାମୁଣ୍ଡାଇ ଓ ଆଳି ବ୍ଲକ ଧୋୟାଞ୍ଚଳର ୧୪ଟି ପଂଚାୟତକୁ ନେଇ ଗଠିତ ବ୍ରାହ୍ମଣୀ ବ୍ଲକ ଗଣ ସଂଗ୍ରାମ ସମିତି ଜରିଆରେ ୧୯୯୩ ମସିହାରେ ଧୋୟାଞ୍ଚଳର ବିଶିଷ୍ଟ ସମାଜସେବୀ ବରିଷ୍ଠ ରାଜନେତା ଦିବଂଗତ ଡା ଗଦାଧର ମଲ୍ଲିକ, ଦିବଂଗତ ପଟ୍ଟାମୁଣ୍ଡାଇ ବ୍ଲକ ପ୍ରାକ୍ତନ ଅଧକ୍ଷ ବ୍ରହ୍ମାନନ୍ଦ ସାମଲ ଦିବଂଗତ ପ୍ରଫେସର ଗୟାଧର ରାଉତ, ଦିବଂଗତ ଅଭୟ ପରିଡା, ଦିବଂଗତ କୃଞ୍ଜ ବିହାରୀ ପାତ୍ର, ଦିବଂଗତ ଧରଣୀଧର ଦାସ ଓ ଦିବଂଗତ ଶ୍ୟାମ ସୁନ୍ଦର ଓଝା ପ୍ରମୁଖ ଧୋୟାଞ୍ଚଳର ବହୁ ବିଶିଷ୍ଟ ବ୍ୟକ୍ତିମାନେ ବ୍ରାହ୍ମଣୀ ବ୍ଲକ ଗଠନ ଦାବୀ ନେଇ ଆନ୍ଦୋଳନ କରିବା ସହିତ ଏ ସମ୍ପର୍କ ତତ୍କାଳୀନ ରାଜ୍ୟ ସରକାରଙ୍କୁ ସ୍ମାରକପତ୍ର ପ୍ରଦାନ କରିଥିଲେ । ତତ୍କାଳୀନ ମୁଖ୍ୟମନ୍ତ୍ରୀ ବିଜୁ ପଟନାୟକ ଏ ଦିଗରେ ଅନୁକୂଳ ମତପୋଷଣ କରିଥିଲେ । ମାତ୍ର ଇତି ମଧ୍ୟରେ ୩୨ବର୍ଷ ବିତି ଯାଇଥିବା ସହିତ ସରକାର ପରେ ସରକାର ବଦଳି ଯାଇଛି । କିନ୍ତୁ ଧୋୟାଞ୍ଚଳବାସୀଙ୍କ ବ୍ରାହ୍ମଣୀ ବ୍ଲକ ଗଠନ ସ୍ବପ୍ନ ଅଧୁରା ରହିଛି । ରାଜ୍ୟ ସରକାର ସମ୍ପ୍ରତି ବ୍ଲକ ପୁନଃଗଠନ ପାଇଁ ଯୋଜନା କରୁଥିବାରୁ ବ୍ରାହ୍ମଣୀ ବ୍ଲକ ଗଠନ ଦାବୀ ପୁନଃଜୀବିତ ହୋଇଛି । ଏହି ଦାବୀ ହାସଲ ପାଇଁ ବ୍ରାହ୍ମଣୀ ବ୍ଲକ ଗଣସଂଗ୍ରାମ ସମିତି ଗଠନ କରାଯାଇଛି । ଆଜି ପଟ୍ଟାମୁଣ୍ଡାଇ ବ୍ଲକ ଅଣ୍ଢରା ସମବାୟ ସମିତି ସମ୍ମିଳନୀ କକ୍ଷରେ ବ୍ରାହ୍ମଣୀ ବ୍ଲକ ଗଠନ ଦାବୀ ନେଇ ଗଣସଂଗ୍ରାମ ସମିତିର ପ୍ରଥମ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଯାଇଛି । ବ୍ରାହ୍ମଣୀ ବ୍ଲକ ଗଠନ ପାଇଁ ଅତୀତରେ ହୋଇଥିବା ଆନ୍ଦୋଳନର ପୁରୋଧାମାନଙ୍କ ପ୍ରତି ଶ୍ରଦ୍ଧାଞ୍ଜଳି ଜ୍ଞାପନ କରାଯାଇ ସଭା କାର୍ଯ୍ୟ ଆରମ୍ଭ ହୋଇଥିଲା । ସାମ୍ବାଦିକ ଚିତ୍ତ ରଞ୍ଜନ ମଲ୍ଲିକଙ୍କ ସଂଯୋଜନାରେ ଆୟୋଜିତ ସଭାରେ ଗଣସଂଗ୍ରାମ ସମିତିର ବରିଷ୍ଠ ସଭ୍ୟ ଡ଼ ଚକ୍ରଧର ଦାସ ପଟ୍ଟାମୁଣ୍ଡାଇ ବ୍ଲକ ପ୍ରାକ୍ତନ ଅଧକ୍ଷ ମାନସ ରଞ୍ଜନ ସାମଲ,ବିପ୍ଲବୀ ନେତା ଅଭିମନ୍ୟୁ ମଲ୍ଲିକ,ବର୍ଷିଆନ ନେତା ଧନେଶ୍ୱର ପ୍ରଧାନ, ଦଳିତ ନେତା ଦଶରଥ ମଲିକ, ପୂର୍ବତନ ସରପଞ୍ଚ ବସନ୍ତ ସ୍ୱାଇଁ, ଶକ୍ତିରଞ୍ଜନ ବିଶ୍ୱାଳ ପ୍ରମୁଖ ସମ୍ମାନିତବକ୍ତା ଭାବେ ଯୋଗ ଦେଇ ବ୍ରାହ୍ମଣୀ ବ୍ଲକ ଗଠନ ଦାବୀର ଯଥାର୍ଥତା ଓ ଆଗାମୀ କାର୍ଯ୍ୟକ୍ରମ ସମ୍ପର୍କରେ ଭାଷଣ ଦେଇଥିଲେ । ଶିକ୍ଷାବିତ ନିରଞ୍ଜନ ସୁନ୍ଦରରାୟ ସ୍ୱାଗତଭାଷଣ ଦେଇ କାର୍ଯ୍ୟକ୍ରମ ସମ୍ପର୍କରେ ସୂଚନା ଦେଇଥିଲେ । ଏହି ସଭାରେ ପ୍ରାଧ୍ୟାପକ ଅଶୋକ ନାୟକ, ସିଂହଗାଁ ସମିତି ସଭ୍ୟ ଅଭୟ ସ୍ୱାଇଁ, ଅମୃତମଣୋହି ସମିତିସଭ୍ୟ ଅନ୍ନପୂର୍ଣ୍ଣା ମଲ୍ଲିକ, ପେଣ୍ଠପାଳ ସମିତି ସଭ୍ୟ ଶଶାଙ୍କ ଶେଖର ବିଶ୍ୱାଳ, ତରଡ଼ିପାଳ ସମିତିସଭ୍ୟ ନିରଞ୍ଜନ ବାରିକ, ଶିକ୍ଷାବିତ ପାର୍ଥସାରଥୀ ଦାଶ ଓ ନିମାଇଁ ମଲ୍ଲିକ କବି ସଚିତ୍ର ବେହୁରା,ଯୁବନେତା ପ୍ରଶାନ୍ତ ସ୍ୱାଇଁ ସମାଜସେବୀ ଅଶୋକ ମଲ୍ଲିକ ଓ ହୃଷିକେଶ ବେହୁରା,ପ୍ରାକ୍ତନ ସରପଞ୍ଚ ରତିକାନ୍ତ ସାହାଣୀ, କୂଳମଣି ମଲିକ ନିଶାମଣି ମହାନ୍ତି,ପ୍ରାକ୍ତନ ସମିତି ସଭ୍ୟ ଅଶୋକ ବିଶ୍ୱାଳ,ବବିତା ମଲିକ, ବାମପନ୍ଥୀ ନେତା ସଂଜୀବ ରାଉତ, ଯୁବନେତା ସିଦ୍ଧାର୍ଥ ଦାସ, ସୌଭାଗ୍ୟ ରଞ୍ଜନ ରାଉତ, ସୁଧାଂଶୁ ଦାସ ପ୍ରମୁଖ ଭାଷଣ ଦେଇ ବନ୍ୟା ବିପନ୍ନ ପଟ୍ଟାମୁଣ୍ଡାଇ ଓ ଆଳି ବ୍ଲକ ଧୋୟାଞ୍ଚଳବାସୀଙ୍କୁ ପ୍ରଶାସନିକ ସୁବିଧା ଯୋଗାଇ ଦେବା ପାଇଁ ବ୍ରାହ୍ମଣୀ ବ୍ଲକ ଗଠନ ଜରୁରୀ ହୋଇ ପଡିଛି ବୋଲି ମତପ୍ରକାଶ କରିବା ସହିତ ସରକାର ତୁରନ୍ତ ଏ ଦିଗରେ ପଦକ୍ଷେପ ନେବାକୁ ଦୃଢ଼ ଦାବୀ କରିଥିଲେ । ଏହି ସଭାରେ ପଟ୍ଟାମୁଣ୍ଡାଇ ଓ ଆଳି ବ୍ଲକ ଧୋୟାଞ୍ଚଳର ୧୪ଟି ପଂଚାୟତର ଲୋକପ୍ରତିନିଧି ମାନ୍ୟଗଣ୍ୟ ବ୍ୟକ୍ତି, ବୁଦ୍ଧିଜୀବୀ ଯୋଗ ଦେଇଥିଲେ ।
Leave a Reply